Aukaverkana-tilkynningar

Hlutverk lyfjafræðinga í lyfjabúðum

Aukaverkanir geta leitt til breytinga í meðferð, t.d. að skipt sé um lyf eða skömmtum breytt.

Því er eðlilegt að lyfjafræðingur vísi sjúklingi til viðkomandi læknis ef um lyfseðilsskyld lyf er að ræða.

Lyfjafræðingur getur tilkynnt aukaverkunina í samráði við lækninn eða hvatt hann til að tilkynna aukaverkunina til Lyfjastofnunar.

Óski sjúklingur eftir því að ekki sé haft samband við lækni tilkynnir lyfjafræðingur aukaverkunina eða aðstoðar sjúkling við tilkynninguna.

Lyfjafræðingar eru hvattir til að tilkynna aukaverkanir lausasölulyfja og náttúrulyfja til Lyfjastofnunar. Einnig eru lyfjafræðingar hvattir til að tilkynna aukaverkanir sem upp kunna að koma þegar skipt er úr einu samheitalyfi í annað.

Minnislisti fyrir lyfjafræðinga við tilkynningu aukaverkunar

Lyfjafræðingur þarf að fá munnlegt samþykki sjúklings vegna tilkynningarinnar og einnig samþykki þess að haft verði samband við lækni.

Lyfjafræðingur skal ávallt hafa samband við lækninn ef þess er nokkur kostur, ef um aukaverkanir af völdum lyfseðilsskyldra lyfja er að ræða.

Tilkynna skal aukaverkun þó aðeins sé grunur um að einkennin séu aukaverkun af völdum lyfs.

Lágmarksupplýsingar sem þarf til að tilkynna aukaverkun

• Aldur og kyn sjúklings
• Hvaða lyf er um að ræða
• Hvaða aukaverkun er um að ræða
• Hver tilkynnir

Til að fá sem bestar upplýsingar er æskilegt að spyrja sjúkling

• hve lengi lyfjameðferð hefur varað
• hver sé ábending lyfsins
• hvenær aukaverkunin kom fram miðað við upphaf meðferðar
• hvaða einkenni sjúklingurinn hafi
• hvaða rannsóknir hafi verið gerðar
• hvaða önnur lyf sjúklingurinn taki 
• hvort lyfjameðferð hafi breyst vegna aukaverkunarinnar
• hvort um sé að ræða annan sjúkdóm sem skipt getur máli
• hvernig sjúklingnum líði núna

Aukaverkanir þegar breytt er  úr einu samheitalyfi í annað

• Frá hvaða lyfi er breytt og í hvaða lyf
• Nákvæmt heiti beggja lyfja og heiti markaðsleyfishafa lyfjanna
• Hvort lyfjanna er talið valda aukaverkuninni

Einnig væri gott að fá upplýsingar um:

• Allar þekktar aukaverkanir sem sjúklingur finnur fyrir við töku lyfsins
• Meintilvik (sérhver óæskilegur læknisfræðilegur atburður) sem hefur orðið t.d vegna misskilnings

Breytist  verkun þegar breytt er úr einu samheitalyfi í annað  má tilkynna það sem aukaverkun

Þess ber að geta að Lyfjastofnun heitir fullum trúnaði við þann heilbrigðisstarfsmann sem tilkynnir. Nafn hans kemur hvergi fram í gögnum sem send eru í EudraVigilance gagnagrunninn né til markaðsleyfishafa.

Nánari upplýsingar varðandi aukaverkanatilkynningar