Jafnréttisstefna

I. Inngangur

Markmið laga um jafna stöðu og jafnan rétt kvenna og karla nr. 10/2008 er að koma á og viðhalda jafnrétti og jöfnum tækifærum kvenna og karla og jafna þannig stöðu kynjanna á öllum sviðum samfélagsins. Með hliðsjón af markmiði laganna og að teknu tilliti til 65. gr. Stjórnarskrárinnar hefur Lyfjastofnun sett sér jafnréttisstefnu.

II. Ábyrgð

Forstjóri Lyfjastofnunar ber ábyrgð á að jafnréttisstefnu stofnunarinnar sé fylgt eftir og haldið við. Sviðsstjórar og deildarstjórar annast eftirlit með að stefnunni sé framfylgt, hver fyrir sína starfsmenn.

III. Markmið

Markmið jafnréttisstefnu Lyfjastofnunar er að allir skuli vera jafnir fyrir lögum og njóta jafnréttis án tillits til kynferðis, aldurs, trúarbragða, skoðana, þjóðernis, kynþáttar, kynhneigðar, litarháttar, efnahags, ætternis, fjölskyldutengsla og stöðu að öðru leyti. Þá skulu konur og karlar alltaf njóta jafns réttar. Lyfjastofnun telur að með því að stuðla að jafnrétti fái færni, hæfileikar og þekking allra starfsmanna notið sín í hvetjandi og þægilegu vinnuumhverfi þar sem skilvirkni og sveigjanleiki eru höfð að leiðarljósi.

IV. Gildissvið

Jafnréttisstefna þessi tekur til allra starfsmanna Lyfjastofnunar.

V. Launajafnrétti

Við ákvörðun launa skal þess gætt að einstaklingum sé ekki mismunað eftir kyni. Viðmiðin sem lögð eru til grundvallar við launaákvörðun skulu vera hin sömu. Í þessu skyni skal stofnunin notast við kynhlutlaus viðmið um frammistöðu í starfi. Konum og körlum skulu greidd jöfn laun og skulu þau njóta sömu kjara að öðru leyti fyrir jafnverðmæt eða sambærileg störf. Með kjörum í þessu sambandi er, auk launkjara, átt við lífeyris-, orlofs- og veikindarétt og hvers konar önnur starfskjör eða réttindi sem metin eru til fjár.

VI. Auglýsingar um laus störf

Laus störf innan Lyfjastofnunar skulu standa opin jafnt konum og körlum. Í auglýsingum um laus störf hjá Lyfjastofnun skulu störf ókyngreind. Þá skal þess einnig gætt að bæði kynin séu höfð í huga við gerð auglýsinga.

VII. Ráðningar í störf

Við ráðningu í störf hjá stofnuninni skal ætíð leggja áherslu á að ráða hæfasta umsækjandann í stöðuna, óháð kyni. Í því sambandi skal líta til málefnalegra sjónarmiða svo sem færni, menntunar, reynslu og hæfni til mannlegra samskipta. Jafnréttissjónarmið skulu metin til jafns á við önnur sjónarmið. Lyfjastofnun stefnir að því að hafa sem jafnast hlutfall kynjanna í hinum ýmsu störfum á öllum sviðum innan stofnunarinnar.

VIII. Samskipti innan stofnunarinnar

Í daglegum störfum innan stofnunarinnar skal þess ætíð gætt að einstaklingum sé ekki mismunað vegna, kynferðis, aldurs, trúarbragða, skoðana, þjóðernisuppruna, kynþáttar, kynhneigðar, litarháttar, efnahags, ætternis og stöðu að öðru leyti, heldur skulu starfsmenn hafa jafna möguleika á að nýta hæfileika sína og þekkingu á sem bestan hátt.

Við úthlutun verkefna meðal starfsmanna stofnunarinnar, tilfærslu og framgöngu í starfi skal þess gætt að einstaklingum sé ekki mismunað vegna kynferðis. Þá skulu starfsmenn stofnunarinnar hafa jafna möguleika til að axla ábyrgð í starfi.

Starfsmenn skulu ekki haga tali sínu og athöfnum þannig að það sé öðru kyninu til minnkunar, lítilsvirðingar eða stríði gegn jafnri stöðu og jafnrétti kynjanna á nokkurn hátt.

IX. Samræming fjölskyldulífs og atvinnu

Öllum starfsmönnum skal gert kleift, ef unnt er, að samræma fjölskyldulíf sitt og atvinnu. Til þess að svo megi verða geta starfsmenn stofnunarinnar óskað eftir því að vinnutími verði aðlagaður að þörfum starfsmannsins. Slíkar beiðnir eru metnar hverju sinni með tilliti til viðkomandi starfs og þarfa stofnunarinnar.

X. Starfsþjálfun og endurmenntun

Allir starfsmenn stofnunarinnar skulu njóta jafnra möguleika til sí- og endurmenntunar. Starfsmenn skulu einnig njóta jafnra möguleika til starfsþjálfunar og til að sækja námskeið sem haldin eru til að auka hæfni í starfi eða til undirbúnings öðrum störfum.

XI. Kynbundin áreitni og kynferðisleg áreitni

Kynbundið áreiti og kynferðisleg áreitni líðst ekki innan veggja Lyfjastofnunar. Með kynbundinni áreitni er átt við hvers kyns ósanngjarna og/eða móðgandi hegðun, sem tengist kyni þess sem fyrir henni verður og er í óþökk eða hefur áhrif á sjálfsvirðingu þess sem fyrir henni verður og er haldið áfram þrátt fyrir að gefið sé skýrt í skyn að hegðunin sé óvelkomin. Áreitnin getur verið líkamleg, orðbundin eða táknræn. Eitt tilvik getur talist kynbundin áreitni ef það er alvarlegt.

Með kynferðislegri áreitni er átt við hvers kyns ósanngjarna og/eða móðgandi kynferðislega hegðun sem er í óþökk og hefur áhrif á sjálfsvirðingu þess sem fyrir henni verður og er haldið áfram þrátt fyrir að gefið sé skýrt í skyn að hegðunin sé óvelkomin. Áreitnin getur verið líkamleg, orðbundin eða táknræn. Eitt tilvik getur talist kynferðisleg áreitni ef það er alvarlegt.

XII. Þátttaka í vinnuhópum

Huga skal að því að vinnuhópar innan stofnunarinnar séu skipaðir báðum kynjum en þó þannig að haft sé að leiðarljósi að nýta bestu sérfræðiþekkingu hverju sinni.

XIII. Jafnréttisfulltrúi

Jafnréttisfulltrúar hvers ráðuneytis fjalla um og hafa eftirlit með jafnréttisstarfi á málasviði þeirra og stofnana á stjórnsýslusviði viðkomandi ráðuneytis.

Starfsmannateymi tilnefnir jafnréttisfulltrúa Lyfjastofnunar. Jafnréttisfulltrúi fylgist með framgangi jafnréttisstefnu þessarar innan stofnunarinnar.

Starfsmaður getur leitað til jafnréttisfulltrúa með mál er varða hvers kyns áreitni eða misrétti.