Fréttir

Harmonet getnaðarvörn ófáanleg hjá heildsölu

Enn eru til pakkningar í apótekum

18.6.2019

Harmonet getnaðarvörn er ófáanleg hjá heildsölu og ekki væntanleg fyrr en í lok ágúst. Lyfjastofnun hefur kallað eftir því að reynt verði að útvega lyfið sem fyrst eftir nýjum leiðum. Enn eru til einhverjar pakkningar af Harmonet í apótekum.

Ekkert lyf með sömu virku innihaldsefnum í sama styrk er á markaði og engin undanþágulyf, en til eru aðrar getnaðarvarnarpillur með sambærilegum eða sömu hormónum og Harmonet, þó í aðeins annars konar blöndu og/eða öðrum styrkleika. Þær konur sem gætu þurft að fá aðra hormónagetnaðarvörn í stað Harmonet ættu að sýna sérstaka aðgát, því virkni lyfja getur verið mismunandi þótt skyld séu. 

Ráð til lyfjanotenda

  • Lyfjastofnun beinir til þeirra lyfjanotenda sem grípa í tómt í apóteki að kanna hvort lyfið sé fáanlegt í öðru apóteki hér á landi. Listi yfir apótek á Íslandi.

  • Ef nauðsynlegt reynist að skipta um hormónagetnaðarvörn er mikilvægt að það sé gert í samráði við lækni.

  • Þegar skipt er um hormónagetnaðarvörn (annað virkt efni) er mikilvægt að hafa í huga að virkni lyfja getur verið mismunandi. Ekki er öruggt að nýja getnaðarvarnalyfið veiti sömu vörn og það sem notað var áður, a.m.k. fyrst um sinn. Til að tryggja að þungun eigi sér ekki stað ætti að íhuga notkun annarrar getnaðarvarnar samhliða s.s. smokksins, a.m.k. fyrstu vikurnar.

  • Einnig er mikilvægt að kynna sér þær öryggisupplýsingar sem við eiga þegar skipt er um hormónagetnaðarvörn. Þessar upplýsingar má nálgast hjá lækni eða hjúkrunarfræðingi sem og í fylgiseðli lyfsins. Fylgiseðill fylgir í pakkningu lyfsins og hann má einnig finna á www.serlyfjaskra.is


Afhverju er lyfið ekki til? Grein um lyfjaskort - ástæður og úrræði

Til baka Senda grein