Fréttir

Kóvar 2 mg töflur hætta – Warfarin Teva 1 mg og 3 mg á markað

25.1.2019

Kóvar töflur sem innihalda warfarín og eru notaðar til blóðþynningar eru ekki lengur framleiddar og munu brátt hætta að fást. Í staðinn eru komnar á markað töflur undir heitinu Warfarin Teva. Þessar töflur eru ekki af sama styrkleika og Kóvar og mikilvægt er að sjúklingar fylgi leiðbeiningum rannsóknarstöðva sem sjá um mælingar vegna blóðþynningarmeðferðar svo breytingin á lyfjunum gangi örugglega fyrir sig hjá hverjum sjúklingi.

Útlit taflnanna:

  • Kóvar 2 mg töflur: Hvít, hringlaga, flöt tafla, 8 mm í þvermál með deiliskoru á annarri hliðinni.
  • Warfarin Teva 1 mg töflur: Brún tafla með WFN ofan við og 1 neðan við deiliskoru á annarri hliðinni og tvöföldum þríhyrningi á hinni.
  • Warfarin Teva 3 mg töflur: Blá tafla með WFN ofan við og 3 neðan við deiliskoru á annarri hliðinni og tvöföldum þríhyrningi á hinni.

Leiðbeiningar til apóteka: Allir sjúklingar sem skipta frá Kóvar yfir í Warfarin Teva þurfa að vera vel upplýstir um að þeir séu að fá nýtt lyf og að gæta þurfi sérstaklega að skömmtun þess. Ráðlagt er að biðja alla sjúklinga um að hafa samband við sína rannsóknarstöð sem sér um mælingar og skammtanir til að fá frekari upplýsingar.

Leiðbeiningar til lækna: Sjá bréf til heilbrigðisstarfsfólks.

Leiðbeiningar til lyfjanotenda: Mikilvægt er að huga vel að skömmtun vegna lyfjabreytingarinnar. Rannsóknarstöðvar sem sjá um mælingar og skömmtun vegna blóðþynningarlyfja munu senda út leiðbeiningar til sjúklinga. Ef einhverjar spurningar vakna um skömmtun skal hafa samband við viðkomandi rannsóknarstöð. Breyting úr einu lyfi í annað skal alltaf gerð í samráði við rannsóknarstöðina.

Til baka Senda grein