Fréttir

Notkun á lyfjum sem innihalda methylfenidat (Concerta, Ritalin, Ritalin Uno) meira en tvöfalt meiri á Íslandi en á Norðurlöndum

Á árinu 2012 seldust 17,4 skilgreindir dagsskammtar á dag af methylfenidat-lyfjum á Íslandi.

24.6.2013

Notkun methylfenidat lyfja á Íslandi hefur um margra ára skeið verið með því mesta sem þekkist. Á síðasta ári nam notkunin hér á landi 17,4 skilgreindum dagsskömmtum á dag fyrir hverja 1.000 íbúa samanborið við Noreg (6,7), Danmörku (7,0) og Svíþjóð (7,7).

Heildarkostnaður þessara lyfja á sl. ári var 748 milljónir króna þar af var kostnaður sjúkratrygginga 668 milljónir króna. Aukning í notkun þessara lyfja milli áranna 2011 og 2012 var 14,4%, aukning í heildarkostnaði 16,8% og aukning í kostnaði sjúkratrygginga 17,4%.

Á undanförnum árum hefur Lyfjastofnun lýst áhyggjum sínum af þessari miklu notkun ekki síst vegna vísbendinga um misnotkun og svartamarkaðssölu.

Lyf í þessum flokki eru ætluð við athyglisbresti með ofvirkni hjá börnum á aldrinum 6 til 18 ára. Mestum hluta lyfjanna er þó ávísað til fullorðinna. Um 59% af ávísuðum lyfjum í þessum flokki árið 2012 var til sjúklinga 18 ára og eldri.

Nýgenginn dómur í Héraðsdómi Reykjavíkur er staðfesting þess að hluti ávísaðra lyfja endar á svörtum markaði með lyf. Lyfjastofnun vill því hvetja lækna að gæta hófs við ávísanir lyfja sem þekkt er að eftirspurn er eftir á svörtum markaði og endurmeta stöðugt þörf viðkomandi sjúklings fyrir þau lyf sem honum eru ávísuð. Einnig hvetur Lyfjastofnun lyfjafræðinga í lyfjabúðum til að halda vöku sinni og láta viðeigandi stofnanir vita þegar grunur vaknar um misferli.

Stækka mynd

Til baka Senda grein