Fréttir

Rannsókn á blóðþynningarlyfjum metin hjá Lyfjastofnun Evrópu

Vísbendingar um áhættu við notkun tiltekinna blóðþynningarlyfja

11.2.2019

Hafin er athugun á vegum Lyfjastofnunar Evrópu (EMA) á rannsókn sem snýr að nokkrum blóðþynningarlyfjum og hugsanlegri hættu á miklum blæðingum við notkun þeirra. Rannsóknin fylgdi í kjölfar vinnustofu sem EMA stóð fyrir árið 2015, en þar kom fram að þörf væri á frekari rannsóknum á verkun blóðþynningarlyfja svo hægt væri að draga úr áhættu við notkun þeirra.

Eliquis, Pradaxa og Xarelto
EMA stóð fyrir því að rannóknin var unnin en henni stýrði Helga Garðarsdóttir lektor í lyfjavísindum við háskólann í Utrecht í Hollandi. Stefnt var að því að meta hættuna á miklum blæðingum vegna notkunar lyfjanna þegar þau eru notuð til að meðhöndla gáttatif, samanborið við önnur blóðþynningarlyf. Lyfin sem tekin voru til skoðunar í umræddri rannsókn eru Eliquis, Pradaxa og Xarelto. Þessi lyf verka á einn tiltekinn storkuþátt í blóði (lyf kölluð DOAC), meðan önnur blóðþynningarlyf eins og Warfarin verka á marga storkuþætti.

Niðurstöður rannsóknarinnar til frekari skoðunar
Niðurstöður rannsóknarinnar sýna að munur er á hættu á verulegum blæðingum milli þessara tveggja tegunda blóðþynningarlyfja. Því var talin ástæða til að rýna rannsóknina og leggja frekara mat á niðurstöður, til að hægt verði að ákveða hvort breyta þurfi skilyrðum og viðmiðum fyrir notkun lyfjanna til að draga úr hættu á blæðingum.

Sérfræðinganefnd Lyfjastofnunar Evrópu um lyf fyrir menn (CHMP) mun fjalla um rannsóknina en nánari upplýsingar er að finna á síðu nefndarinnar á vef EMA. 

Til baka Senda grein