Innflutningur
Innflutningur ávana- og fíkniefna er háður innflutningsleyfi útgefnu af Lyfjastofnun sbr. 6. gr. reglugerðar nr. 233/2001. Fyrirtæki sem hafa leyfi til innflutnings lyfja geta sótt um innflutning á ávana- og fíkniefnum með skriflegri umsókn. Leyfið er gefið út í þríriti, eitt eintak (hvítt) er sent til útflytjandans til að hægt sé að fá útflutningsleyfi í útflutningslandi, eitt eintak (gult) er notað til að leysa ávana- og fíkniefnið úr tolli og síðasta eintakið (grænt) er sent til baka til Lyfjastofnunar eftir innflutning ásamt upplýsingum um magn innflutts efnis, innflutningsdagsetningu og ef flutt er minna inn en upphaflega var sótt um þarf að upplýsa um ástæðu þess.
Ársfjórðungslega sendir Lyfjastofnun skýrslu til INCB með upplýsingum um hversu mikið magn af ávana- og fíkniefnum hefur verið flutt til landsins byggt á staðfestum tölum um innflutning frá innflytjendum (grænu eintök innflutningsleyfanna).
Um áramót senda innflytjendur upplýsingar um lagerstöðu ávana- og fíkniefna um áramót til Lyfjastofnunar ásamt upplýsingum um innflutning, útflutning og fyrningar ávana- og fíkniefna frá árinu á undan. Með hliðsjón af þeim tölum sækir Lyfjastofnun um kvóta til INCB fyrir innflutning til Íslands árið eftir.
Útflutningur
Útflutningur ávana- og fíkniefna er háður útflutningsleyfi útgefnu af Lyfjastofnun. Fyrirtæki sem hafa leyfi til framleiðslu eða heildsöludreifingu lyfja geta sótt um leyfi til útflutnings á ávana- og fíkniefnum sbr. 6. gr. reglugerðar nr. 233/2001 með skriflegri umsókn. Leyfið er gefið út þegar útflytjandinn hefur sent Lyfjastofnun innflutningsleyfi frá yfirvöldum í innflutningslandinu ásamt umsókn um útflutningsleyfi.
Umsóknir
Sótt er um leyfi fyrir hverri sendingu vegna innflutnings eða útflutnings á ávana- og fíkniefnum. Einungis þau fyrirtæki sem hafa leyfi til innflutnings lyfja geta sótt um leyfi til innflutnings eða útflutnings ávana- og fíkniefna. Til að fylla út umsókn, þarf að fara inná mínar síður hjá Lyfjastofnun og fylla út umsóknina þar. Það er á ábyrgð umsækjanda að upplýsingar í umsókn séu réttar. Með umsókn fyrir útflutningsleyfi þarf að fylgja innflutningsleyfi frá innflutningslandi.
Lyfjastofnun afgreiðir umsóknir um inn -og útflutningsleyfi fyrir ávana- og fíkniefni yfirleitt innan viku frá móttöku. Útgefin inn- og útflutningsleyfi eru send í pósti frá Lyfjastofnun á þriðjudögum. Reynt er að gefa út öll leyfi sem berast fyrir þriðjudag en ekki er hægt að tryggja afgreiðslu umsókna sem berast á fimmtudegi eða síðar, fyrir næsta þriðjudag.
Hægt er að óska eftir flýtimeðferð með því að senda erindi í gegnum Hafa samband á vefsíðu Lyfjastofnunar.
- Veldu málefni úr listanum: Inn- eða útflutningsleyfi, eftir því sem við á.
- Efni: skrifið „Áríðandi – óskað eftir flýtimeðferð á umsókn leyfis“
- Skilaboð: Tilgreina hvaða lyf er í umsókninni og hvort óskað sé eftir að sækja leyfið eða fá sent í pósti.
Umsækjanda verður svarað með tölvupósti þegar leyfið er tilbúið.
Hægt er að óska eftir sækja útgefið leyfi með því að senda erindi í gegnum Hafa samband á vefsíðu Lyfjastofnunar.
- Veldu málefni úr listanum: Inn- eða útflutningsleyfi, eftir því sem við á.
- Efni: skrifið „Áríðandi – óskað eftir að sækja leyfi„
- Skilaboð: Tilgreina hvaða lyf er í umsókninni og hvenær er óskað eftir að sækja útgefið leyfi.
Umsækjanda verður svarað með tölvupósti þegar leyfið er tilbúið.
Kostnaður við hvert leyfi er samkvæmt gjaldskrá Lyfjastofnunar.