Um innflutning einstaklinga á lyfjum fer eftir reglugerð nr. 1277/2022 auk, eftir því sem við á, reglugerð nr. 233/2001 um ávana- og fíkniefni og önnur eftirlitsskyld efni.
Heimilt er að flytja til landsins lyf til eigin nota, með ákveðnum takmörkunum, að því tilskildu að um sé að ræða lyf til notkunar fyrir menn sem aflað hefur verið með lögmætum hætti.
Innflutningur einstaklinga
Einstaklingar mega flytja inn lyf til eigin nota í farangri og pósti frá ríkjum innan EES að uppfylltum ákveðnum skilyrðum.
Einstaklingar mega hafa í fórum sínum við komu til landsins frá ríkjum innan EES, lyf til eigin nota í magni sem svarar til árs notkunar samkvæmt notkunarfyrirmælum læknis eða markaðsleyfishafa/framleiðanda lyfs. Ef einstaklingur er að koma frá ríki utan EES er heimildin takmörkuð við 100 daga skammt.
Þegar um er að ræða lyf, sem innihalda efni sem finna má í köflum S1 (vefjaaukandi efni) og S2 (peptíð hormón, vaxtarþættir og skyld efni) á bannlista Alþjóðalyfjaeftirlitsstofnunarinnar (WADA; World Anti-Doping Agency) er einstaklingi eingöngu heimilt að flytja til landsins til eigin nota magn sem svarar til 30 daga notkunar samkvæmt notkunarfyrirmælum læknis eða markaðsleyfishafa/framleiðanda lyfs.
Ávana- og fíknilyf
Einstaklingum er heimilt að koma með til landsins lyf til eigin nota, sem innihalda að hluta til efni sem tilgreind eru í fylgiskjali 1 við reglugerð nr. 233/2001 um ávana- og fíkniefni og önnur eftirlitsskyld efni, með eftirfarandi takmörkunum.
Hafi einstaklingur skráð lögheimili hér á landi gildir eftirfarandi:
- Ef lyfjanna er aflað á Íslandi, er einstaklingi heimilt við komuna til landsins að hafa meðferðis ávana- og fíknilyf í magni sem samsvarar 30 daga skammti.
- Hafi lyfjanna verið aflað erlendis er einstaklingi heimilt við komuna til landsins að hafa meðferðis ávana- og fíknilyf í magni sem samsvarar 7 daga skammti.
- Ef lyfjanna hefur verið aflað erlendis og viðkomandi hefur í fórum sínum við komuna til landsins yfirlýsingu frá lækni með gilt lækningaleyfi hér á landi sem segir til um að viðkomandi einstaklingi séu lyfin nauðsynleg í læknisfræðilegum skilningi, er heimilt að koma með sem nemur til 30 daga skammti af ávana- og fíknilyfjum.
Hafi einstaklingur ekki skráð lögheimil hér á landi gildir eftirfarandi:
- Einstaklingum sem ekki hafa skráð lögheimil hér á landi er heimilt við komuna til landsins að hafa meðferðis ávana- og fíknilyf í magni sem samsvarar 30 daga skammti samkvæmt skilgreindum dagskammti.
Einstaklingur á ferðalagi milli yfirráðasvæða eða innan yfirráðasvæða Schengen samningsaðila má hafa meðferðis ávana- og fíknilyf í því magni sem nauðsynlegt er vegna læknismeðferðar að því tilskildu að viðkomandi framvísi vottorði sem er gefið út eða staðfest af þar til bæru yfirvaldi í búsetulandi, sbr. 75. gr. Schengensamningsins. Slík vottorð gilda að hámarki í 30 daga frá útgáfudegi.
Skilgreindur dagskammtur er meðalmeðferðarskammtur á dag fyrir tiltekið lyf, notað við algengustu ábendingu þess hjá fullorðnum. Meðalmeðferðarskammtur er skilgreindur í markaðsleyfi lyfs eða samkvæmt skilgreiningu sem Alþjóðaheilbrigðismálastofnunin gefur út.
Póst- eða vörusending
Einstaklingi er heimilt að flytja til landsins með póst- eða vörusendingu lyf til eigin nota frá ríkjum evrópska efnahagssvæðisins í magni sem svarar til 100 daga notkunar samkvæmt notkunarleiðbeiningum læknis eða markaðsleyfishafa/framleiðanda lyfs.
Óheimilt er að flytja til landsins lyf frá ríkjum utan evrópska efnahagssvæðisins með póst- eða vörusendingu.
Óheimilt er að flytja inn ávana- og fíknilyf með póst- eða vörusendingu.
Óheimilt er að flytja inn lyf og lyfjavirk efni sem eru á bannlista Alþjóðalyfjaeftirlitsstofnunarinnar, svo sem efni sem finna má í köflum S1 (vefjaukandi efni) og S2 (peptíð horóm, vaxtaþættir og skyld efni).
Gögnum sem skylt er að framvísa við komu til landsins
Við komu til landsins er einstaklingi skylt að framvísa til tollyfirvalda einhverju að eftirtöldu sem sýnt getur fram á lögmæti innflutnings lyfja sem einstaklingur kemur með til landsins:
- Vottorð læknis.
- Lyfjaávísun ásamt fyrirmælum um notkun.
- Áritunarmiði sem færir fullnægjandi sönnun fyrir því að ávísunarskyldra lyfja hafi verð aflað með lögmætum hætti og lyfin séu viðkomandi nauðsynleg í því magni sem tilgreint er.
Athuga skal að ofangreint á bara við þegar um er að ræða ávísunarskyld lyf.
Undanþágur
Lyfjastofnun er heimilt að veita undanþágur frá ofangreindu þegar sýnt er fram á að takmarkanir á heimild til innflutnings á lyfjum til eigin nota stofni heilsu eða lífi einstaklings í hættu.
Sótt er um undanþágu á Mínum síðum Lyfjastofnunar eða með tölvupósti á [email protected]. Sé um að ræða ávana- og fíknilyf skal undanþága frá Lyfjastofnun liggja fyrir áður en einstaklingur kemur með lyfið til landsins.
Ef um almenn lyf er að ræða skal sækja um undanþágu í síðasta lagi tveimur vikum frá því að lyfið kemur til landsins.