Samevrópska gáttin um klínískar lyfjarannsóknir (CTIS) var tekin í notkun þann 31.janúar 2022 samhliða nýrri reglugerð á sviði klínískra prófana á Evrópska efnahagssvæðinu (EES). Þriggja ára aðlögunartímabili lauk 31. janúar 2025 og frá þeim tíma fer allt umsóknar- og eftirlitsferli með klínískum lyfjarannsóknum fram í kerfinu.
CTIS er grunnur sem nær yfir allt ferli klínískra prófana frá upphafi til enda og stuðlar að gagnsæi, yfirsýn og skilvirku eftirliti. Rannsakendur geta með einföldum hætti sótt um, fylgst með og séð stöðu rannsókna í gegnum gáttina.
Á innleiðingartímabilinu hefur CTIS stöðugt verið þróað og bætt. Í mars sl. var tekinn í gagnið leitarmöguleiki í gegnum gagnvirkt landakort, þar sem nú er hægt að skoða allar klínískar lyfjarannsóknir innan EES með notendavænum og sjónrænum hætti. Í október sl. var gáttin einnig uppfærð þannig að almenningur og rannsakendur geta leitað upplýsinga á öllum opinberum tungumálum á EES svæðinu. Athugið þó að í sumum tilvikum birtist íslenska sem danska í tungumálavalmynd, en innihaldið ætti að vera skýrt og aðgengilegt.
Rétt er einnig að benda á að skjölin í rannsóknargögnunum sjálfum eru á því tungumáli sem þau voru upphaflega rituð á og fylgdu umsókninni um viðkomandi rannsókn. Því er líklegt að enska skili fleiri niðurstöðum en leit á öðrum tungumálum, sérstaklega þegar um fjölþjóðarannsóknir er að ræða.
Rannsakendur eru hvattir til að kynna sér vel þá möguleika sem CTIS veitir og nýta sér þau tæki og þjónustu sem stöðugt eru að þróast fyrir alþjóðlegt samstarf, samskipti við eftirlitsaðila og vistun rannsóknargagna á öruggan og aðgengilegan hátt.