Nýjar upplýsingar tengdar notkun bóluefnisins Ixchiq voru meðal þess sem fjallað var um á marsfundi lyfjaöryggisnefndar Lyfjastofnunar Evrópu (EMA). Farið var í að endurmeta rannsóknargögn um bóluefnið eftir að borist hafði öryggisboð (safety signal) vegna gruns um alvarlega aukaverkun af notkun þess.
Ixchiq er bóluefni gegn sýkingu af völdum chikungunya veirunnar. Þetta er fyrst og fremst hitabeltissjúkdómur en veiran berst með moskítóflugum. Öryggisboðið sem um ræðir varðaði heilahimnubólgu af völdum veiru sem greindist í kjölfar bólusetningar hjá ungum og að öðru leyti hraustum einstaklingi.
Á síðasta ári fjallaði PRAC hins vegar um Ixchiq vegna gruns um alvarlegar aukaverkanir hjá fólki eldra en 65 ára. Þá voru gefnar út þær leiðbeiningar að ekki skyldi gefa bóluefnið fólki eldra en 65 ára. Þeim takmörkunum fyrir notkun lyfsins var aflétt að lokinni rannsókn, þó með þeim tilmælum að bólusetja einungis með Ixchiq þegar miklar líkur væru á smiti af völdum veirunnar, og að undangengnu mati á hvort ávinningur bólusetningar teldist meiri en áhættan. Þau tilmæli gilda fyrir alla aldurshópa.
Niðurstaða nú
Heilahimnubólga af völdum veiru, sem og heilabólga, voru fyrir þetta tilvik skráðar sem þekktar aukaverkanir Ixchiq af óþekktri tíðni – tilfelli of fá til að hægt sé að reikna út tíðni. En í ljósi þess að heilahimnubólga af völdum veiru greindist í ungum, hraustum einstaklingi í kjölfar bólusetningar, verða lyfjatextar bóluefnisins uppfærðir með þeim upplýsingum
Lyfjaöryggisnefndin yfirfer nú þessu til viðbótar helstu gögn um bóluefnið Ixchiq, sem lið í reglubundnu mati á áhættu og ávinningi af notkun lyfsins (PSUR). Reiknað er með að þeim rannsóknum ljúki í júní á þessu ári.