Fréttir

Jarðvegurinn plægður fyrir rafræna fylgiseðla

Vinnustofa á vegum nokkurra evrópskra stofnana 28. nóvember nk.

22.11.2018

Í næstu viku standa Lyfjastofnun Evrópu (EMA), forstjórar lyfjastofnana Evrópulanda og Framkvæmdastjórn Evrópusambandsins fyrir vinnustofu með hagsmunaaðilum úr ýmsum áttum, í því skyni að móta stefnu og sameiginlegar leiðir til að leggja grunn að rafrænum fylgiseðlum. 

Öllum lyfjum sem hafa markaðsleyfi evrópska efnahagssvæðinu fylgja upplýsingar til sjúklinga annars vegar og heilbrigðisstarfsfólks hins vegar. Þrátt fyrir að reynt hafi verið að gera þessar upplýsingar auðlesanlegar, er þörf á að bæta um betur eins og fram kemur í skýrslu Framkvæmdastjórnar ESB um þessi mál, einkum hvað varðar fylgiseðlana. Þar geta rafrænar lausnir gengt stóru hlutverki.

Lyfjaupplýsingar fyrir notendur er nú um stundir að finna sem prentaða fylgiseðla í lyfjapakkningunni og yfirleitt líka á vefjum lyfjastofnananna – og þá sem pdf-skrár. Nýir tæknimöguleikar gera að verkum að með rafrænni útgáfu fylgiseðla er hægt að uppfæra upplýsingar með lítilli fyrirhöfn og lágum kostnaði miðað við það sem nú gerist. Með þeim hætti ætti að vera tryggt að sjúklingurinn hafi alltaf nýjustu upplýsingar um notkun og verkun lyfsins, sem ætti að auka öryggi til muna. Að auki verður sjóndöprum gert auðveldara um vik að lesa fylgiseðlana.

Til vinnustofunnar er boðið heilbrigðisstarfsmönnum og fræðimönnum, sem og fulltrúum sjúklinga, góðgerðarstofnana, lyfjamarkaðarins og stjórnvalda. Reynt verður að greina þarfir þessara mismunandi hópa, tækifæri til breytinga, og einnig kortleggja hvaða vinna fer fram á þessu sviði í hverju landi og hvernig það rímar við það sem gerist annars staðar í heiminum.

Afrakstur vinnustofunnar verður nýttur til að setja saman drög að grunnreglum um rafræna fylgiseðla á evrópska efnahagssvæðinu sem mun liggja frammi í samráðsgátt í sex mánuði frá og með janúar nk. Hægt verður að fylgjast með vinnustofunni í beinni útsendingu á vef EMA frá kl. 9-18 þann 28. nóvember.  

Til baka Senda grein