Fréttir

Nýtt frá PRAC – mars 2019

Skimun vegna lyfja sem innihalda flúoroúracil til skoðunar

18.3.2019

Sérfræðinefnd EMA um eftirlit með ávinningi og áhættu lyfja (PRAC) kom saman dagana 12.-15. mars sl. Nefndin hefur hafist handa við að meta aðferðir við skimun sjúklinga, sem mælt er með að fari fram áður en ávísað er lyfjum sem innihalda flúoroúracil. Matið nær einnig til lyfja sem umbreytast í flúoroúracil í líkamanum, capecitabine, tegafúr og flucýtósín. Mat sérfræðinefndarinnar snýr að því hversu vel núverandi skimunaraðferðir hafa reynst til að finna þá sjúklinga sem eiga á hættu að fá alvarlegar aukaverkanir við notkun lyfjanna. -Flúoroúracil, capecitabine og tegafúr eru krabbameinslyf, en flúoroúracil til útvortis notkunar er notað við ýmsum húðsjúkdómum, og flucýtósín við alvarlegum sveppasýkingum.

Tiltekið ensím verður að vera til staðar

Vitað er að sumt fólk skortir ensím sem kallast díhydrópyrimídín dehydrógenasi (DPD) og er nauðsynlegt til að líkaminn geti brotið niður flúoroúracil. Sé ensímið ekki til staðar magnast styrkur efnisins í blóðinu og getur það haft alvarlegar afleiðingar; skaðað sum hvítu blóðkornin, valdið skemmdum á taugakerfi, alvarlegum niðurgangi eða slímhúðarbólgum í munni. Því er afar mikilvægt að ljóst sé hvort DPD-ensímið er til staðar áður en læknir ávísar flúoroúracil-lyfjum. Allt að 8% hafa DPD einungis í lágum styrk og 0,5% hafa það alls ekki.

Til athugunar hvort þrengja þarf skilyrði

Hingað til hefur verið mælt með erfðarannsókn með tilliti til skorts á virkni DPD áður en þessi krabbameinslyf eru gefin, en markviss skimun hefur ekki verið sett sem skilyrði fyrir notkun þeirra. Sérfræðinefndin mun nú meta hvort fyrri aðferðir hafa reynst fullnægjandi, sérstaklega í ljósi þess að nýjar upplýsingar um erfðafræðirannsóknir og annars konar DPD skimun hafa komið fram.

Eitt lyf sem inniheldur flúoroúracil er á markaði á Íslandi, Flurablastin. Einnig lyfið Xeloda sem inniheldur capecitebine.

Frétt EMA um fund PRAC í mars

Dagskrá PRAC fundar í mars

Skráning á póstlista Lyfjastofnunar

Til baka Senda grein