Árið 2025 var stórafmælisár hjá Lyfjastofnun Evrópu (EMA). Fagnað var þremur áratugum af samvinnu systurstofnananna í Evrópu sem hafa unnið að því markmiði að tryggja mannfólki og dýrum í ríkjum Evrópu aðgengi að góðum og öruggum lyfjum, með sameiginlegum viðmiðum, lögum og reglum.
Lyf fyrir menn
Í skýrslunni kemur fram að EMA mælti með að 104 lyf fyrir menn fengju markaðsleyfi árið 2025. Af þeim voru 38 með ný virk efni. Þetta ár var því sömuleiðis fagnað að 25 ár voru síðan Evrópureglugerðin um fágæt lyf (e. orphan medicines) tók gildi. Hún hefur greitt leið í þróun lyfja við sjaldgæfum sjúkdómum, sem talið er að um 36 milljónir manna í Evrópu þjáist af. Talað er um sjúkdóm sem sjaldgæfan þegar færri en 5 af hverjum 10.000 eru haldnir honum. -Sextán af þeim lyfjum sem samþykkt voru hjá EMA árið 2025 töldust til fágætra lyfja.
Lyf fyrir dýr
Þrjátíu lyf fyrir dýr fengu samþykkt fyrir markaðsleyfi hjá EMA árið 2025. Þar af voru ný virk efni grunnur 13 þeirra. Sextán dýralyfjanna voru bóluefni, sjö af þeim hlutu samþykki vegna sérstakra aðstæðna (e. marketing authorisation under exceptional circumstances) til að bregðast við heilsuvá.
Bæði rafræn og gagnvirk, en einnig prenthæf
Í ársskýrslunni er m.a. gerð grein fyrir meginþáttum í starfi sérfræðinganefnda EMA árið 2025, sem og markmið til nánustu framtíðar. Einnig er þar fjallað um nýframkomna stefnu allra aðildarstofnananna til 2028 (EU Medicines Agencies Network Strategy - EMANS), um lista nauðsynlegra lyfja, og um evrópsku lyfjaskortsvaktina (European Shortages Monitoring Platform - ESMP), svo eitthvað sé nefnt.
Ársskýrsla EMA árið 2025 er bæði fáanleg á rafrænu og gagnvirku formi, en einnig prenthæf á pdf sniði. Báðar gerðir má finna í gegnum sama tengil á vef EMA.