Markaðsleyfishafar lyfja sem innihalda metótrexat á Íslandi, Pfizer ApS og medac Gesellschaft für Spezialpräparate GmbH hafa í samráði við Lyfjastofnun Evrópu og Lyfjastofnun sent bréf til heilbrigðisstarfsmanna varðandi ráðstafanir til að koma í veg fyrir mistök við notkun lyfjanna.
Tilkynnt hefur verið um mistök við skömmtun með alvarlegum afleiðingum, þar með talin dauðsföll, þegar metótrexat, sem ætlað er til notkunar einu sinni í viku við bólgusjúkdómum, var notað daglega. Eingöngu læknar með sérþekkingu í notkun lyfja sem innihalda metótrexat eiga að ávísa þeim.
Heilbrigðisstarfsfólk sem ávísar eða afgreiðir metótrexat til notkunar við bólgusjúkdómum skal fylgja eftirfarandi verklagi:
- Veita sjúklingi/umönnunaraðila tæmandi og skýr fyrirmæli um skömmtun einu sinni í viku;
- Við hverja nýja ávísun/afgreiðslu, ganga úr skugga um að sjúklingur/umönnunaraðili skilji að nota eigi lyfið einu sinni í viku;
- Ákveða með sjúklingi/umönnunaraðila á hvaða vikudögum sjúklingurinn eigi að nota metótrexat;
- Upplýsa sjúkling/umönnunaraðila um einkenni ofskömmtunar og leiðbeina þeim um að leita til læknisaðstoðar ef grunur leikur á ofskömmtun.
Nánari upplýsingar er að finna í bréfinu, og að auki má finna ítarlegar upplýsingar um lyfin sem innihalda metótrexat í sérlyfjaskrá.