Þannig var staðan meira og minna allt árið 2023. Í janúar var þó um sérstakt frávik að ræða sem gerð var grein fyrir í frétt um tilkynningar fyrstu þrjá mánuði þess árs, og í október og nóvember voru minni frávik. Áður hafði einnig verið gerð grein fyrir aukaverkanatilkynningum í apríl, maí og júní, en nú er sjónum beint að því helsta á síðari sex mánuðum ársins 2023.
Október og nóvember
Eins og sjá má á súluritinu er fjöldi tilkynninga heldur meiri í október og nóvember en mánuðina fyrir og eftir. Það skýrist af bólusetningarátaki fyrir forgangshópa sem hófst um miðjan október; boðið var upp á bólusetningu við bæði inflúensu og COVID-19, samtímis ef þess var óskað, og þarna var um að ræða viðkvæma hópa, 60 ára og eldri auk fólks í áhættuhópum.
Í október tengdust 14 af 43 tilkynningum bóluefnum; í sumum þeirra var tilkynnt bæði um inflúensu- og covid-bóluefni. Auk þess bárust Lyfjastofnun í október gögn frá Embætti landlæknis um lyfjatengd andlát.
Í nóvember voru 10 af 40 tilkynningum vegna gruns um aukaverkun af bóluefnum, bæði covid-bóluefni (Comirnaty) og bóluefnum gegn öðrum sjúkdómum.
Fjöldi tilkynninga eftir tilkynnendum
Í júlí barst ein tilkynning frá lækni, þrjár frá öðru heilbrigðisstarfsfólki, þrettán frá lyfjafræðingum, og 10 frá notendum eða aðstandendum.
Í ágúst bárust þrjár tilkynningar frá læknum, tvær frá öðru heilbrigðisstarfsfólki, níu frá lyfjafræðingum og 9 frá notendum eða aðstandendum.
Í september barst ein tilkynning frá lækni, fimm frá lyfjafræðingum og fimm frá notendum aða aðstandendum.
Í október bárust fjórar tilkyningar frá læknum, tuttugu frá öðru heilbrigðisstarfsfólki, fimm frá lyfjafræðingum og þrettán frá notendum eða aðstandendum. Í einu tilviki var ekki greint frá stöðu tilkynnanda
Í nóvember bárust fimm tilkynningar frá læknum, ein frá öðrum heilbrigðisstarfsmanni, tuttugu frá lyfjafræðingum, og ellefu frá notendum eða aðstandendum. Í þremur tilvikum var ekki greint frá stöðu tilkynnenda.
Í desember bárust 7 tilkynningar frá læknum, tvær frá öðrum heilbrigðisstarfsmönnum, sjö frá lyfjafræðingum og þrjár frá notendum eða aðstandendum. Í einu tilviki var ekki greint frá stöðu tilkynnanda.
Rétt er að taka fram að um tilkynningar vegna gruns um aukaverkun er að ræða. Það merkir að tilkynnt tilvik hafa átt sér stað í kjölfar lyfjanotkunar, en segir ekki til um hvort um orsakasamhengi sé að ræða milli tilvikanna og lyfjanotkunarinnar.
Fjölda aukaverkanatilkynninga ber alltaf að skoða í samhengi við notkun lyfs eða bóluefnis.
Mikilvægt að tilkynna um aukaverkun lyfs
Enn skal ítrekað að aukaverkanatilkynningar veita mikilvægar upplýsingar um öryggi lyfja þegar þau eru komin í almenna notkun. Því er rétt að hvetja almenning jafnt sem heilbrigðisstarfsfólk til að senda upplýsingar um slík tilvik til Lyfjastofnunar.
Heilbrigðisstarfsmanni sem hefur grun um alvarlega, nýja eða óvænta aukaverkun af notkun lyfs í störfum sínum, er skylt að tilkynna það til Lyfjastofnunar. Þessi skylda er bundin í lög sem tóku gildi í ársbyrjun 2021, hana er að finna í 63. gr. lyfjalaga.
Allir geta tilkynnt grun um aukaverkun lyfs
Hægt er að tilkynna rafrænt í gegnum gátt á vef Lyfjastofnunar. Auk þess getur heilbrigðisstarfsfólk tilkynnt í gegnum Sögukerfið á þar til gerðu eyðublaði.