Tilkynningar um aukaverkanir lyfja það sem af er ári, eru mun færri í hverjum mánuði að jafnaði en var að meðaltali árið 2019. Meðaltal ársins 2019 var 19 tilkynningar á mánuði, meðaltal fyrstu átta mánaða þessa árs er 8,25.
Tilkynningar um aukaverkanir í ágúst sl. eru undir meðaltali ársins, eða sex talsins. Tvær tilkynninganna voru um alvarlega aukaverkun.
Fjórar af þeim sex aukaverkanatilkynningum sem bárust Lyfjastofnun í ágúst voru frá læknum, ein frá einstaklingi úr annarri heilbrigðisstétt og ein frá notanda.
Tilkynningar um aukaverkanir skipta miklu máli og veita mikilvægar upplýsingar um öryggi lyfja þegar þau eru komin í almenna notkun. Þá má minna á að Lyfjastofnun Evrópu hefur hvatt sérstaklega til þess að aukaverkanir lyfja sem gefin hafa verið við COVID-19 verði tilkynntar, sem og aukaverkanir af lyfjanotkun vegna annarra sjúkdóma meðan á Covid-veikindum stendur.
Allir geta tilkynnt um aukaverkun lyfs, almenningur jafnt sem heilbrigðisstarfsmenn. Hægt er að tilkynna rafrænt um aukaverkun í gegnum gátt á vef Lyfjastofnunar.