Fréttir

Fyrri ákvörðun vegna parasetamóls staðfest

6.12.2017

Í september síðastliðnum ráðlagði PRAC, sérfræðinefnd EMA um eftirlit með ávinningi og áhættu lyfja, að parasetamól með breyttan losunarhraða yrði tekið af markaði. Breyttur losunarhraði lyfja þýðir að virka efnið skilar sér í líkamann á lengri tíma en í þeim lyfjum sem ætlað er að verka skömmu eftir inntöku. Ákvörðun um tilmælin var tekin í ljósi þess hve erfitt getur reynst að veita rétta meðhöndlun í þeim tilvikum þegar of stór skammtur hefur verið tekinn. Oft er ekki vitað hvort tekið var fljótverkandi parasetamól eða með breyttan losunarhraða, en meðferðin er ólík eftir því um hvort er að ræða.  Afleiðingar þessarar óvissu geta verið lifrarskemmdir og jafnvel dauði og því telur PRAC áhættuna af parasetamóli með breyttum losunarhraða of mikla.

Tvö lyfjafyrirtæki sem selja parasetamól með breyttan losunarhraða óskuðu eftir því að ákvörðunin frá í september yrði endurskoðuð. Því mati er nú lokið og hefur sérfræðinefndin komist að sömu niðurstöðu og áður, að mæla með því að parasetamól af þessu tagi verði tekið af markaði.

Á Íslandi er eitt lyf á markaði sem inniheldur parasetamól með breyttan losunarhraða, Paratabs retard 500 mg forðatafla. Í gildi eru einnig leyfi fyrir önnur lyf sem ráðleggingar PRAC ná til, en þau eru ekki á markaði.

Til baka Senda grein