Tilkynningar um aukaverkanir lyfja sem bárust Lyfjastofnun í janúar sl. voru fleiri en nokkru sinni á mánaðartímabili. Þær voru 235 talsins, fleiri en berast að jafnaði á heilu ári.
Að líkindum hefur tilkynningaskylda heilbrigðisstarfsfólks sem bundin er í ný lyfjalög, haft þau áhrif að tilkynningum fjölgaði. Einnig kann aukin vitund almennings um mikilvægi aukaverkanatilkynninga á tímum heimsfaraldurs að skýra þetta að einhverju leyti. Miðlun upplýsinga um bóluefni gegn COVID-19 og hugsanlegar aukaverkanir af þeim hefur enda verið áberandi. Á vef Lyfjastofnunar er þannig að finna sérstaka síðu þar sem fjallað er um aukaverkanir sem gætu fylgt COVID-19 bóluefnum. Þar eru uppfærðar daglega upplýsingar um fjölda aukaverkanatilkynninga sem borist hafa Lyfjastofnun, og áhersla lögð á að í þeim er tilkynnt um grun um aukaverkanir, ekki er um staðfest tilvik að ræða.
Fjöldi tilkynninga eftir alvarleika
Af tilkynningum janúarmánaðar tengdust 208 bóluefnum gegn COVID-19; 139 vegna Comirnaty (BioNTech/Pfizer), og 69 vegna bóluefnis Moderna. Tuttugu og sjö tilkynninganna tengdust öðrum lyfjum.
Tuttugu og tvær af tilkynningum janúarmánaðar voru vegna gruns um alvarlega aukaverkun, og tengdust 11 þeirra Comirnaty, hinar 11 tengdust öðrum lyfjum.
Fjöldi tilkynninga eftir tilkynnendum
Fimmtíu og átta tilkynninganna voru frá læknum, en langflestar tilkynningar bárust frá öðrum heilbrigðisstarfsmönnum, eða 131. Lyfjafræðingar sendu sjö tilkynningar um aukaverkanir, og 39 bárust frá notendum eða aðstandendum þeirra.
Mikilvægt að tilkynna um aukaverkun lyfs
Enn skal áréttað að aukaverkanatilkynningar veita mikilvægar upplýsingar um öryggi lyfja þegar þau eru komin í almenna notkun. Því er rétt að hvetja almenning jafnt sem heilbrigðisstarfsfólk til að senda upplýsingar um slík tilvik til Lyfjastofnunar, allir geta tilkynnt grun um aukaverkun lyfs. Hægt er að tilkynna rafrænt í gegnum gátt á vef Lyfjastofnunar.
Í því sambandi má minna á að Lyfjastofnun Evrópu hefur hvatt sérstaklega til þess að aukaverkanir lyfja sem gefin hafa verið við COVID-19 sjúkdómnum þar á meðal vegna bóluefna gegn COVID-19, verði tilkynntar, sem og aukaverkanir af lyfjanotkun vegna annarra sjúkdóma meðan á COVID-19 veikindum stendur.