Fréttir

Um fundi Lyfjastofnunar með hagsmunaaðilum vegna Brexit

Kallað eftir upplýsingum frá markaðsleyfishöfum og umboðsmönnum

24.1.2019

Lyfjastofnun efndi til funda með hagsmunaaðilum í síðustu viku vegna útgöngu Breta úr Evrópusambandinu (Brexit) og hugsanlegra áhrifa hennar á það sem snýr að lyfjamálum. Annars vegar var haldinn fundur með markaðsleyfishöfum og umboðsmönnum, hins vegar með fulltrúum apóteka og heilbrigðisstofnana.

Brexit gengur í gildi kl. 23:00 þann 29. mars
Á fundunum var bent á að útganga Breta er tímasett kl. 23:00 þann 29. mars næstkomandi. Fyrir þann tíma þurfa markaðsleyfishafar og umboðsmenn að gera ráðstafanir til að skrásetning lyfjafyrirtækja og ferla ýmis konar sem verið hafa í Bretlandi, verði færð til einhvers af EES-ríkjunum; Bretland verður eftir útgönguna skilgreint sem þriðja land í samningum hvað varðar framleiðslu á hráefnum og innflutning á tilbúnum lyfjum. Að öðru leyti var nefnt að mikil óvissa ríkti um framvinduna, enda enn óljóst hvort Bretland fer úr ESB með eða án samnings. Fundarmenn voru hvattir til að búa sig undir „hart Brexit“, og gera þar með ekki ráð fyrir aðlögunartíma til að breyta ferlum.

Glærur frá fundum með hagsmunaaðilum. 

Kallað eftir upplýsingum frá markaðsleyfishöfum og umboðsmönnum
Í framhaldi af fundunum voru markaðleyfishöfum og umboðsmönnum send bréf þar sem kallað var eftir upplýsingum um hver væri staða ferla er snúa að markaðsleyfi viðkomandi og bregðast þurfi við vegna Brexit. Sömuleiðis hvort fyrirséð væru vandamál vegna útgöngu Breta úr ESB. Óskað hefur verið eftir að Lyfjastofnun verði sendar upplýsingar um stöðu hvers markaðsleyfishafa fyrir 6. febrúar nk. á netfangið lyfjastofnun@lyfjastofnun.is, þar á meðal hvort reikna megi með afskráningum lyfja hér á landi, og hvort gera megi ráð fyrir lyfjaskorti af þessum sökum.

Þá skal bent á að birtar hafa verið upplýsingar á vef Lyfjastofnunar á formi spurninga og svara um það helsta sem snýr að Brexit í tengslum við lyfjamál. 

Til baka Senda grein