Dagana 23.-30. júní sl. fór fram alþjóðleg aðgerð á vegum Interpol, Pangea XV. Lyfjastofnun tók þátt í í samstarfi við starfsmenn tollsgæslusviðs hjá embætti Skattsins.
Pangea aðgerðin er hluti af samstarfi tollgæsluembætta á alþjóðavísu og alþjóðalögreglunnar, Interpol. Markmið samstarfsins er að efla eftirlit og samstarf milli ólíkra stjórnsýslustofnana til að berjast gegn ólöglegum flutningi lyfja milli landa.
Viðskipti með ólögleg lyf á alheimsvísu eru ábatasöm, en Interpol áætlar að verðmæti þeirra nemi um 4,4 milljörðum bandaríkjadala.
Alls tóku 94 aðildarlönd Interpol þátt í aðgerðinni og var hald lagt á 3 milljónir einingar af ólöglegum og mögulega lífshættulegum lyfjum og lækningatækjum. Þá var rúmlega 4.000 vefsíðum sem buðu upp á slíkan varning lokað.
Áherslur Lyfjastofnunar og embættis Skattsins í Pangea XV aðgerðinni snéru að fölsuðum lyfjum í póstsendingum. Upp komu þrjú mál á þeim tíma sem aðgerðin varði og voru þau öll áframsend til Interpol.
