Í dag hlaut Lyfjastofnun viðurkenningu Umhverfisstofnunar fyrir fyrsta græna skrefið af fimm. Stjórnvöld leggja áherslu á að allar stofnandir ríkisins innleiði Græn skref í ríkisrekstri fyrir árslok 2021, eins og fram kemur í loftslagsstefnu Stjórnarráðsins og Lyfjastofnun lætur ekki sitt eftir liggja.
„Við höfum unnið markvisst af því að taka grænu skrefin frá því í lok síðasta árs en þá var umhverfisnefnd Lyfjastofnunar sett á laggirnar“, segir Helena W Óladóttir, sem leiðir starf nefndarinnar. „Við hófum árið með endurskoðun umhverfis- og loftslagsstefnu Lyfjastofnunar og með henni fylgir markviss aðgerðaáætlun þar sem lagðar eru línur fyrir hvert skref.“
En árangur í umhverfismálum næst ekki nema með samstilltu átaki og góðum hópi starfsfólks. „Við erum svo heppin að starfsfólk Lyfjastofnunar hefur tekið vel í þær breytingar sem við höfum gert, sinnir flokkun af miklum móð og er áhugasamt um að leggja sitt af mörkum til að markmið ársins náist.“