Fréttir

Lyfjastofnun Evrópu undirbýr flutning til Amsterdam

Táknræn athöfn þegar Evrópufánar voru teknir niður í Lundúnum

30.1.2019

Eins og fram hefur komið verða höfuðstöðvar Lyfjastofnunar Evrópu (EMA) fluttar frá Lundúnum vegna útgöngu Breta úr Evrópusambandinu. Síðla árs 2017 var kosið um hver framtíðarstaður EMA yrði að Brexit loknu en nítján borgir sóttust eftir að fá stofnunina til sín. Amsterdam varð fyrir valinu og nú styttist í að starfsemin verði flutt. Hollensk yfirvöld hafa þegar afhent forstjóra EMA bygginguna sem mun hýsa stofnunina til bráðabirgða, en framtíðarhúsnæðið er í smíðum. Flutt verður frá Lundúnum 1. mars nk, en þar hafa höfuðstöðvarnar verið frá stofnun Lyfjastofnunar Evrópu árið 1995.

Fánar teknir niður
Síðastliðinn föstudag, 25. janúar, fór fram táknræn athöfn þegar fánar Evrópusambandsríkjanna sem blakt höfðu við hún fyrir framan höfuðstöðvarnar í Lundúnum um árabil, voru teknir niður. Guido Rasi forstjóri EMA þakkaði við það tækifæri breskum yfirvöldum fyrir stuðninginn við starfsemina og sagði Breta hafa verið góða gestgjafa.




Til baka Senda grein