Fréttir

Ný reglugerð um heimildir tannlækna til að ávísa lyfjum gefin út

Nýja reglugerðin, reglugerð nr 477/2019 kemur í stað eldri reglugerðar um ávísanir tannlækna á lyf, nr 1077/2006.

12.8.2019

Lyfjastofnun vekur athygli á að ný reglugerð sem fjallar um heimildir tannlækna til að ávísa lyfjum hefur verið birt í B-deild Stjórnartíðinda. Nýja reglugerðin, reglugerð nr. 477/2019, kemur í stað eldri reglugerðar um ávísanir tannlækna á lyf, nr. 1077/2006.

Tilefni breytinganna er að bregðast við uppfærslu sem gerð hefur verið á ATC flokkum auk þess að laga reglugerðina að þeim breytingum sem orðið hafa á lögum, en lög um tannlækningar nr. 38/1985 voru felld úr gildi árið 2013.

Meðal þeirra breytinga sem gerðar hafa verið á þessu sviði með nýju reglugerðinni er að lyfið Tramadól, sem gert var eftirritunarskylt árið 2013, hefur verið fært í fylgiskjal 2 með öðrum eftirritunarskyldum lyfjum og er nú einungis ætlað til nota í starfi. Það er í samræmi við hertar aðgerðir heilbrigðisyfirvalda gegn misnotkun ávanabindandi lyfja.

Tannlæknum er nú skylt að halda sérstaka skrá yfir notkun eftirritunarskyldra lyfja. Þá hefur Lyfjastofnun fengið það hlutverk nú að veita tannlæknum með sérfræðileyfi eða sérstaka þekkingu og reynslu, undanþágu til að ávísa lyfjum, öðrum en þeim sem tilgreind eru í reglugerðinni, en þetta verkefni var áður hjá heilbrigðisráðuneytinu. 

Til baka Senda grein